1 Musa 31:36-44

SERMON PARHALADO SA-RESSORT PERSATUAN

Kamis, 12 Agustus 2010

1 Musa 31:36-44

“Pandonganion ni Debata”

I. Patujolo

Di bagasan hapogoson do sahat si Jakob tu huta ni tulangna, si Laban di luat Padan Aram. Ndang mararta, jala ndang marhepeng. Dibahen tulangna i ma ibana marmahan dorbiana, jala diulahon ibana do i dohot denggan. Mamboan pasupasu do si Jakob i di tulangna i, lam tamba do sinamotna jala lam mamora ibana. Songon i pe i, ndang gabe dihaholongi si Laban i ibana. Nang pe gabe diparhela ibana muse, ndang hea dirajumi ibana anggota ni keluargana, alai anak gajianna do. Gogo ni si Jakob i do na ringkot di ibana, ndang anggo pribadina. Mansam do angkal dibahen asa lumeleng nian si Jakob i di jolona jala sai boi eksploitasionna, asa lam tamba nian sinadonganna. Ia so na mangotootoi ma i, na mangose padan manang na paubaubahon upana. Alai sai didongani Debata do si Jakob i gabe ndang mago boti ibana di panggosagosa ni hulahulana i, margogo do ibana jala togu, gabe jala mamora, jala i ma na gabe bohalna tu tingki na mangihut.

II. Hatorangan ni Turpuk

Dibagasan turpuk on, tarrimas si Jakob tu si Laban (Simatuana). Alasanna: Parjolo, na diperlakukan si Laban do si Jakob songon anak gajianna. Ala ni i, di mata ni uhum dohot natorop, di toru ni huasona do ibana, songon i jolmana, angka anakna ro di sude artana. Molo lintun ibana, marhuaso do si Laban mangeahi jala mamboan ibana mulak manang mamunusa, mambahen jolmana dohot angka anakna gabe hatobanna jala mangarampas nasa ugasanna. Sian sisi i, di ingananna do molo piripirion si Laban mangeahi si Jakob. Alai ala adong do parjanjian antara nasida na dua taringot tu si Lea dohot si Rahel laos songon i taringot tu upa lojana, ndang adong sala ni si Jakob disi jala ndang adong dalan ni si Laban mambahen songon i.

Paduahon, muruk si Jakob ala dituhas ibana manangko terapim jala disungkapi. Terapim manang debata idup i ma ganaganan ni debata rumah tangga ni si Laban. So diboto si Jakob, na ditangko si Rahel do debata idup ni si Laban i. Sangkapna ra, bahen legalitas ni hak pewarisan ni si Jakob do di arta ni si Laban. Mangihuthon adat di luat i, anak siahaan do na manean terapim ni amana. Alai na boi masa do na gabe mimbar hak i tu tinodohonna. Manang ise pe na manean i, dapotan godang paruntungan do i taringot tu parbagi ni teanteanan. Sian 1 Mus.31:1-2 torang, hak pewarisan i do na gabe sibonsiri ni ketidakserasian di antara ni si Jakob dohot angka anak ni si Laban. Didok rohanasida, ndang parsidohot si Jakob di hak i, hape diahuti ibana do mansai godang sian ugasan ni amanasida. Si Laban pe, ditolopi do pingkiran i, ai ndang songon na sai laonna i be bohina tu si Jakob. Di roha ni si Rahel, marhitehite na memiliki terapim i, nang pe na ditangko, ndang tarsoadahon agia ise be na marhak do si Jakob manean arta ni si Laban, simatuana i jala ndang targugat agia ise be angka naung gabe jambarnasida ala ni gogo dohot pangulaon ni tungganedolina i. Nang di roha ni si Laban, bahen legalitas ni arta naung niahutna sian ibana, mansai berkepentingan do si Jakob memiliki debata idup i. I do alana asa dituhas ibana si Jakob i manangko terapimna i.

Na patoluhon, ditaringoti do sude pambahenan ni simatuana i saleleng na dua pulu taon ibana rap dohot nasida.                                                                                                                                  Ro do si Jakob tu Padan Aram songon pelarian. Pogos, ndang adong hepeng manang artana. Ala ni i ingkon gajian do ibana tu si Laban pitu taon laho mangomo si Rahel. Ndang dijalo ibana agia aha, sude gajina dibuat si Laban do jala diparetonghon bahen sinamot ni boruna i. Saleleng na pitu taon i dihilala si Laban do na mamboan pasupasu si Jakob i di ibana, ai martambatamba do ugasanna. I do alana asa di hajujumpang ni tingkina digontihon si Lea laho mangalehonsa tu si Jakob. Dianto rohana do na so laho tolopan ni si Jakob i. Haboratan do muse si Jakob ai ndang i padannasida hian. Alai ala naung sanga diparjolma si Lea i, ndang tarpaulaksa be. Pintor ditawarhon si Laban ma parpadanan na imbaru, gajian muse si Jakob i pitu taon nari laho mangomo si Rahel. Dioloi si Jakob do i, mangula ma ibana di si Laban pitu taon nari. Marhite i hagohan do giot ni roha ni si Laban di arta, hagohan dohot sihol ni roha ni si Jakob marjolmahon si Rahel. Nang pe songon i ndang sombu dope roha ni si Laban, sai na hurang leleng dope si Jakob i di jolona di rohana. Ala ni i, dung salpu na pitu taon paduahon i jala mangido mulak helana i tu Kanaan (1 Mus.30:25) ditawarhon ma muse parpadanan na imbaru, mangula ibana manang na piga taon laho mangomo na di ibana. Ditohoi si Jakob do i jala dioloi. I ma dalanna, sahat tu halilintunna i tuk do dua pulu taon ibana raphon simatuana i. Saleleng na dua pulu taon i diulahon si Jakob do haparmahanion na denggan. Di mulana, dipangido si Jakob do angka siganding dohot na marrintik sian hambing dohot birubiru ni simatuana i ma di ibana bahen upana, angka sibirong hot ma i di simatuana i. Pintor ditolopi si Laban do i, ndang ala burju ni rohana, tung ala ni na rangkak do hambing dohot birubiru na songon i di luat i. Alai ditumpahi Debata do si Jakob i, ai dung songon i padannasida gabe gumodang do tubu anak ni hambing dohot birubiru i sibolang dohot na marrintik jala hombar tusi gabe gumodang ma bagian ni si Jakob asa bagian ni simatuana i. Marnida i, dipauba si Laban ma upana; na birong nama di si Jakob, di ibana nama angka sibolang dohot na marrintik. Dioloi si Jakob do i. Hape, gabe gumodang ma muse tubu na birong sian sibolang dohot na marrintik, jala ala ni i sai tong ma gumodang jambar ni si Jakob. Dipauba si Laban muse, di ibana ma angka na birong; angka sibolang dohot na marrintik di si Jakob. Songon i ma sahat tu sampulu hali sai dipauba si Laban upa ni si Jakob i, alai laos songon i ma tong jotjotna tarhirim ibana, ai sai dihombari Debata do si Jakob jala dipasupasu (1 Mus.30:27).

Parpudi didok si Jakob: “Aut unang didongani Debata ni damang i ahu, Debata ni si Abraham, jala na hinabiaran ni si Isak, ra tung palahoonmu boti ahu; alai ditatap Debata do pardangolanhi dohot halojaon ni tanganhu, gabe dipinsang hamu na borngin nantuari.”  Diparhatopot si Jakob do na didongani Debata do ibana, ditatap do pardangolan dohot halojaon ni tanganna. I do umbahen na mararta ibana. Ndang ala ni haporseaonna, tung asi ni roha ni Debata do.

Ndang haalusan si Laban sude hata ni si Jakob i. Manghilala ma rohana na so patut do tutu na binahenna i, ai anakhonna do nasida, jala na di ibana do na di nasida sude. Tung patut ma bahenonna na so uhum tu na di ibana sandiri? Ala ni i, diusulhon ma asa marpadan nasida di bagasan dame, gabe marpadan nasida tutu (1 Mus.31:45).

III. Sipahusorhusoron 

1. Marhite turpuk on, dipatuduhon Debata do tongtong asi ni rohaNa ( kesetianNa) tu si Jakob songon sahalak na mardosa ibana na jolo (kisah Esau dan Yakub; 1 Musa 25: 29-34).
2. Pengalaman ni si Jakob suman  do tu pengalaman ni bangsonta. Nang pe naung leleng dijajah Bolanda i bangsonta jala nunga mamora nasida tabahen, ndang hea tubu di rohanasida memerdekakan. Songon i ma sahat tu na tunduk Hindia Belanda tu Tentera Dai Nippon, torus do hita bangso na tarjaja. Dibagasan tolu ratus lima pulu taon hita dijaja Bolanda, tolu satonga taon dijaja Jepang dos do anggo dangolna. Marbagabaga do nian Japang i mangalehon kemerdekaan tu bangsonta, alai sahat tu na tunduk nasida tu Sekutu, ndang sanga i digohi. Jadi mardeka pe hita ndada ala basabasa ni panjaja i, alai suman tu haluaon ni si Jakob sian huaso ni simatuana, ala na taparjuanghon do. Nang pe songon i, so mansoadahon parjuangan dohot pengorbanan ni angka pahlawan, songon na tarsurat di Pembukaan Undang-udang Dasar 1945 i, ingkon parhatopotonta do tongtong paboa basabasa ni Debata do kemerdekaanta i. Ndang sai sude bangso na marjuang sahat tu kemerdekaan. Apala i ma na ringkot ingotonta di na manghalashon Hari Ulang Tahun ke-65 Proklamasi Kemerdekaan ni bangsonta, Negara Republik Indonesia na tahaholongi on, naeng pujionta do Debata jala dohononta mauliate tu Ibana ala ditumpakhon tu hita hamonangan dohot haluaon