Epesus 5 : 15 – 20

Sermon Parhalado HKBP Sidikalang, Minggu XI Dung Trinitatis

Epesus 5 : 15 – 20

Patujolo[1]

     Marsual do angka na badia (manjanghon Jesus) na di Epesus taringot tu hakaristenon. Marbingkas sian pangalaho ni halak jahudi na sai mangondolhon tradisi hajahudion tu halak na so Jahudi (Gorik, Jahudi Proselit). Gabe masa ma parbolatan. Hape nunga lobi dua taon lelengna dipadasip Apostel Paulus tu nasida tagan manghobasi ibana di luat i. Tongon nunga di hurungan ni Rom be si Paulus. Ditongoshon ma surat Epesus on, laho paingothon nasida asa “sada”, na targoar angka na badia i. marhite I ma, ondolan ni surat epesus I ma

   1). Hamoraon     : ala naung manjanghon Tuhan Jesus

   2). Hasadaon     : Sisada panjouon di bagasan Kristus.

Di Bindu 5 on, manaringoti Parange hatiuron; di angka naung pinamora ni Debata. Digoari do angka anak haholongan ni Debata, angka na sai mamparangehon parange hatiuron. Di ayat 15-20 secara khusus diondolhon angka anak haholongon i-anak hatiuron i; asa malo mamangke bisuk na sian Debata, di ngoluna ganup ari.

Hatorangan   

Ay. 15 Antong, manat ma hamu mamereng manangkasi parulaonmuna; songon angka na marroha, unang ma songon angka na hurang roha!

Pandohan marroha sian hata gorik didok sophos/Sophia, na marlapatan roha na marbisuk sian Debata. Habisuhon na nionjar ni haporseaon na tangkas tu Debata. Mansai andul do I tu parbinotoan (gorik: logos)na marhaojahan tu logika nang parbinotoan ni jolma. Asa ganup angka naung mangolu di hatiuron ingkon dasip mamangke roha bisuk na sian Debata laho manat manangkasi ulaonna ganup. Ulaon siganup ari. Asa luhut ulaon I tongon marhaojahan tu haporseaon. Horhonon ni I do roha na tangkas marbisuk mandalani ngolu di arsak nang las ni roha. Roha na marbisuk sian Debata huhut do I mangurupi asa lam jamot sasahalak marnida halak na asing, gabe margogo paagohon “roha ahu”. Marhite na manangkasi “parulaon” do nang tarida parbue ni haporseaon tu Tuhan Jesus. Jakobus  2:17 Haporseaon i pe songon i do: Anggo so adong pangulaonna, naung mate do hadirionna.

Ayat 16 Parhaseang hamu ma tingki, ai ari hasusaan do nuaeng.

Adong do 2 di hata gorik taringot tu tingki. καιρος- "KAIROS"  dohot χρονος-"KRONOS".[2] Dipangke do hata kairos di ayat on, na mangondolhon tingki na jempek manang kesempatan na terbatas do si nuaeng on. Alani I ma asa ganup mangharingkothon tingki-menghargai waktu, na dipasahat Debata dope tu hita. Ai adong do hasusuda ni tingki I, laos angka hasusaan do na masa andorang hasusuda ni tingki i. Pandohan “tingki” martudutudu do tu partingkian na jempek ni ngolu ni sasahalak di portibion na ingkon di bagasan roha bisuk na sian Debata mangadopi ragam ni hasusaan. Songon I do nang pandohan “ari hasusaan do nuaeng” martudutudu na adong do ari sogot na sonang sihirimon ni angka na porsea. Marhite I ma asa luhut angka na porsea mamangke kairos gabe sada kesempatan laho patangkas parulaon. 

Ayat 17 Dibahen i, unang ma gabe maoto hamu; alai antusi hamu ma, manang dia lomo ni roha ni Tuhan i

Habisuhon I ma mangantusi jala mangulahon angka lomo ni roha ni Debata, jala dipasiding angka sogo ni roha ni rohaNa. Baliksa, haotoon do molo mamingkiri jala mangulahon ulaon na so lomo ni roha ni Debata. Isarani na ma mabuk bahenon ni anggur, ai hamagoan do di bagasan i. anggur I ma gombaran hinatonggi ni portiobion na olo mambahen mabuk hajolmaon, gabe dang “sadar iman”. Saluhutna na I angka ulaon sogo ni roha ni Debata do i.  Alai di angka na sai tongtong gok Tondi ni Debata, malo do tahe mangorom dirina, sian saluhut hinauli nang hinagiot ni portibi on.

5:19 Hatahon hamu ma sama hamu angka ende psalmen, angka ende pujipujian dohot ende partondion; endehon jala puji hamu ma Tuhan i di bagasan rohamuna!

Marende, I ma hapapatar ni haunduhon tu Debata. Mansai maol do mangendehon na so dapot di roha. Ai ende, I ma ungkapan ekspresi ni jiwa ni sasahalak. Laos songon I do, mangendehon ende psalmen, pujipujian nang ende partondion, nionjar ni haporseaon na mangolu do i. Ternyata, sada rumang ni komunikasi na mansai uli do ende, jolma tu Debata, nang Debata tu jolma. Lam jotjot, lam tangkas, lam do hangoluhon sasahalak ende pujipujian tu Debata (nang pe di bagasan roha) gabe sada gogo do I sian Debata mangadopi angka tantangan ni ngolu. Laos di si do margogo Manongtong mandok mauliate siala saluhutna (las ni roha nang arsak) tu Debata Ama, di bagasan Goar ni Tuhanta Jesus Kristus!

---

[1] Andorang so sahat dope apostel Paulus di Epesus, nunga mangajari si Apollos tu halak Epesus. Diajarhon ibana patik ni Debata songon I nang taringot tu Pandidion ni si Johannes, alai dang diajarhon taringot tu Tondi Porbadia. Dung sun ibana mangajari sian epesus, mebat ma ibana tu Korintus, laos di tingki I ma apostel Paulus bongot tu Epesus. Manghobasi do Apostel Paulus di Epesus lobi sian dua taon lelengna. Marjamita ma ibana ganup ari di parsikolaan ni si Tiranus (Ul. 19). Dipatorang nang taringot tu Tondi Porbadia.

[2] καιρος - "KAIROS" adalah waktu yang terbatas sedangkan χρονος - "KRONOS" adalah waktu dalam pengertian umum. 'KAIROS' dapat bermakna kesempatan, waktu yang tertentu, bahkan musim-musim dalam satu tahun; sedangkan"KHRONOS' adalah waktu secara kuantitatif, suatu periode yang diukur dari akhir suatu kejadian.
"KHRONOS' juga merupakan merupakan penggantian waktu, bandingkan dengan kata "kronologi" dalam bahasa Indonesia.