Jesaya 2 : 1 – 5

BAHAN SERMON HKBP RESS. PERSATUAN

Tu Minggu VIII Ndung Trinitatis

Ev. Jesaya 2 : 1 – 5

= = = = = = = = == = = = = = = = = = = = = = = = = = = = = = = = = = = = = = = = =

MARHATIURON  DI  DALAN  NI  TUHAN  JAHOWA

1.       Andorang so tu habuangan Babel Bangso Israel, jumolo dilumbahon Panurirang Jesaya tu nasida uhum ni Debata taringot tu dosa ni nasida i. Diholsohon Panurirang Jesaya do halumlamon ni  pangalaho di Jerusalem, dipasingkorsingkor do na pogos, dipupusi halak na rot u bagas joro. Alani marsitutu si Jesaya paingothon Bangso Israel asa disolsoli dosana. Songon hamamago ni Bangso Israel ala dosanan, songon i do nang hamamago ni Juda ala pangalaosionna di patik ni Debata. Alani ima si Jesaya mangalumbahon uhum ni Debata. Dohot diparbadabadaan na masa sian halak Juda maradophon angka Bangso na asing, Jerusalem dohot Juda dohot angka Bangso na asing pe. Alai ndung masa uhum ni Debata, dipatuduhon Debata do asi ni rohaNa, suruonNa Mesias mangapuli nasida, jala pasadaon pasipasi ni Bangso i sian habungan, jala mardame dibagasan Ibana, marpungu ma sandok angka Bangso tu dolok ni Jahowa manghalashon haroroNa (Gebo und Euaengelion).

2.       Sian Jamita on, boi taputikputihi songon undolan ni jamita on, ima:

ü  Ayat 1: Jumolo dipabotohon Panurirang Jesaya hadirion na tu halak Juda dohot Jerusalem, ia hadirionna patar marharoroan si Debata Jahowa (a man of integrity). Marhite parsuruon, pamilliton, manang parsuruon ni Debata jala marharoroan sian hata ni Debata naung binege do ibana manghatahon sipaingot, uhum, dohot tona tu halaka Juda dohot Jerusalem. Ndada sian hamaloan manang sian hutokhutok ibana laho manghatahon i. Molo tapamanat tu ganup panggomgominta si nuaeng, toropan do nasida mambahen sada haputusan sian pamingkirion nasida sambing. Suang songoni do nang toropan di tongatonga ni huria, patar jala tarida do huaso ni sasahalak pangula ni huria na sai margogo laho pasauthon aha na dipingkiranna. Ndang marningot be ibana di tona manang tohonan najinalona sian Debata. Nunga lupa ibana di dirina. Ido asa parjalo sahali dipangido tu hita marhite jamita on, asa intropeksi diri hita (Self- introspection). Ise do hita jala ise do namarsuru hita? (Pat. Ef. 5: 8-9)

ü  Ayat 2 : Dison dihatahon si Jesaya do ima taringot ari marsogot, di ujung ni angka ari, du…. Namarlapatan do i taringot tu tingki manang ombas ni ngolu ni jolma di portibion (ari paruhuman, ari parpudi, ari haroro ni Jesus Kristus na paduahon tu portibion), songon na didokna di surat Heber 1:2. Songon tardisi ni angka ompu nasida na jolo, dirajumi jala dihatindanghon nasida do: ia dolok na timbo ima songon dolok na badia inganan ni angka debata sileban / Paganisme (Pat. Psalm. 48: 2). Borhat sian pangantusion ni ompu nasida do si Jesaya manghatahon inganan bagas ni Debata na ingkon di sada dolok na timbo. Alai ala ni pngantusion na songon i, jumolo do borhat angka bangso parbegu manangkohi dolok i, nang pe so diboto nasida ise Debata na mian jala maringanan disi. Ia dolok na nidok na dison ima dolok Sion/ dolok Moria (1 Musa 22: 2).   On do tong na masa ditongatonga ni toropan halak Kristen tarlumobi hita Bangso Batak, na sai marsishohot di hata poda, dohot uhum ni ompunta sijolojolo tubu. Alai na tuani ma ro angka Panurirang, parbarita na uli tu tongatonga ni Bangsonta mamboan barita na uli, hatiuron dohot las ni roha di hita, gabe patar tarida Asi dohot holong ni roha ni Debata Jahowa di ngolunta.

ü  Ayat 3 : Ndung adong pangantusion na mangolu taringot tu hata ni Debata, gabe torop do angka Bangso manakhohi dolok i, jala marsibetabetaan do nasida, (nangpe di angka ari na salpu marsalisi nasida) laho mandapothon Bagas ni Debata di punsu ni dolok i laho mangido pangajarion sian Debata. Ala ni panandaion dohot hamubaon ni diri, dihatindanghon angka Bangso i (pinompar ni si David) dolok sion i songon haroroan ni patik jala Jerusalem songon hroroan ni hata ni Jahowa. Ndung targoar jala tarbarita hita songon marga na tarpillit, hamalimom na raja, bangso na badia, houm naginonggoman (1 Pet 2: 9) marhite panandaionta di Debata sian angka parbarita na uli, torop do hita manghlomohon as prjmbar hita di Jerusalem na imbaru (Harajon ni Debata) di ari marsogot.. Nang pe torop angka musunta diangka ariari na salpu, dohot do nasida taarahon ro manopot harajaon ni Debata. Alani i ma, di ayat on, disosoi do hita muse asa taarahon angka donganta suang songoni nang angka musunta (nasida na so tumanda dalan dohot lomo ni roha Debata, songon si David na mangarahon sude bangso na ginonggomanna asa marsomba tu adopan ni Debata Jahowa.

ü  Ayat 4 : Di ari haluaon i, uhumon ni Debata ma Bangso na mangalo Ibana, na so tumangihon patik, tona, uhum dohot aturan ni Ibana, dohot angka Bangso na olo pasingkorsingkorhon angka jolma na pogos gale. Jala di tingki i do jumpang hadameon di sandok angka Bangso. Angka Bangso ndang be mamingkiri angka sinjata na ringkot tu parporangan, ala nunga hohom be nasida dibagasan Dame na sian Debata, gari ada tahe dirongsonghon jala di topa nasida sinjat I gabe ulaula sipangkeonna di lading, hauma, dohot porlak nasida; podang gabe tinggala, hujur gabe sasabi. Mansohot ma nasada bada, ndang adong be pangosagosaon tu angka na pogos gale, sonang ma nasida na porsea jala na mangoloi Debata di Jerusalem na imbaru i. Sonang ma roha ni partani hundul di toru ni hau anggurna manggotil parbue na porngis. Ndang tahutan be angka partani ala ni porang, sonang rohana ala ndang adong be na mangalelelele nasida.

ü  Ayat 5 : Dison digombarhon si Jesaya do boha panjouon ni angka Bangso tu pinompar ni si Jakkob (Halak Juda) , asa tong nasida siparjambar di harajaon ni Tuhan i. asa unang be nasida songon halak na sai mardalani di haholomon, di hagunturon,parbolatbolatan, ala naeng ma nian tong nasida gabe hatiuron di dalan ni Jahowa. Ido tong na laho sipabotohononta tu sandok ruas ni hurianta, asa hohom hita dibagasan Tuhan i, asa taruli hita di HarajaonNai. Jala ingkon do tong pabotohononta tu sandok humaliang hita sangkap dohot lumo ni roha ni Debata, ai hona uhum do songon angka namangalaosi dohot na marsineang di  patik, tona, aturan ni Debata, tarlobi di angka na marsogo ni roha mida donganna jolma, na mandobu dongon, na pasiaksiakhon angka donganna na pogos gale. Boi do hita manghatindanghon tu angka musunta tarlobi na mangelaela, pasingkorsingkorhon hita halak Kristen, isarana Islam na so manghatindanghon Jesus Kristus? Boi do tadok ugamonta on do sintong? Songon na tahaporseai pandohan ni Jesus: Ahu do dalan i dohot hasintongan,….. (Joh. 14: 6),  asa tong taruli jala parjambar nasida di Harajaon ni Debata? Dohononta do: na maol do mangulahon i. Tutu situtu do i maol taulahon, ala ni aha?Ai hita pe so boi do singkop parulaonta di adopan ni Debata, jala maol dope hita mardame dohot dirinta, dohot donganta, musunta, tarlobi dohot Tuhan i.jadi boha ma bahenonnt asa boi hita mardame? Songon hatiurondi tongatonganta? Tatangkasi ma jumolo dirinta, taparhatutu, taokkui jala tapajojorma hasalaanta di adopan ni donganta, tarlumobi di adopan ni Debata. Songon nidok ni angka sipande bisuk na mandok:” Si boru puas ma, siboru bakara. Molo ndung puas sae ma soada mara’. Molo dung songon i, dang adong be masa parsalisian di tongatonganta, jala targoar ma hita si boan hatiuron di anka donganta.  

3.       Panimpuli

Songon Bangso, marga na badia, dohot houm naginonggomanNa hita, naung jinou na hita sian haholomon tu hatiuron, naeng ma hita tongtong marhatiuron di dalan ni Tuhan Jahowa di ganup panggulmiton ni ngolunta, asa gabe hatiuron hita di angka donganta, jala tabolongkon ma sian rohanta angka roha “HOTEL”, asa tong parjambar hita di harajonNai (Jerusalem na imbaru i) di ari paruhuman, di ari marsogot. Nang pe torop jala marragam pardompakta, pandohanta, pingkiranta, ingkon sauduran do hit mandok: Ia AHU dohot HO sada do di adopan ni Debata, ingkon marsomba tu adopan adopanNa do hita dingoluon, asa jumpang di hita haluaon dohot las ni roha nasian Tuhan i di ari paruhuman i. Mansai las do rohanta molo gabe sipardohon nian sude jolma i di harajaon ni Debata, torop bilangn ni paorsea di Ibana. Alani i mananda diri ma hita, jala tatangkasi ma manang dia do lomo ni roha ni Tuhan i (Ef. 5: 10). Amen……