2 Korint. 5: 17 – 21

Tu Minggu V Dung Trinitatis (Ev. 2 Korint. 5: 17 – 21)

Kamis, 21 Juli 2011

“Sitanda Kristus, ima jolma angka na olo di paimbaru”

1.      Patujolo

Surat 2 Korintus, ima surat na ginurithon (tinongos) ni Apostel Paulus di Makedonia di taon 50 an dM. Huta Korintus i ma sada huta na mansai ribur, jala inganan paisolatan ni sandok jolma sian liat portibion. Dihatihai, gabe huta/inganan dagang do huta Korintus (Pusat perdagangan) di sandok portibion. Jala ido na ni igil ni Apostel Paulus, asa anggiat barita nauli/hakaristenon i tarbarita tu sandok portibion. Dimasa ni surat on, adong do parbolatbolat di tongatonga ni halak Kristen (Kristen dohot Kristen Yahudi), halak Kristen Yahudi na sai marsihohot di Patik ni Debata
jala na so manghaporseai/manghatindangkon hadirion/haApostelon ni ibana. Gabe adong tarida panggosagosaon tu halak Kristen sian halak Kristen Yahudi (Tradisi), ala tumoropan halak Kristen Yahudi di huta i. Laos dihatindanghon nasida (Halak Kristen Yahudi) do uhum/patik ni Debata na gabe pardengganan ni jolma tu Debata. Ido asa didok Apostel Paulus mamungka sian ayat11-21”Kritus do pardengganan ni jolma tu Debata”. Ndang adong be na boi tarpatupa jolma laho patigorhon dirina di adopan ni Debata, ala nunga sange madabu tu dosa (Rom.3: 10+12), ndang boi so hona uhum jolma ala ni dosana (2 Korint. 5: 10). Ndang boi be lias jolma sian paruhuman ni Debata, alani asa unang hona uhum jolma i, diparade Kristus diriNa gabe pardengganan, diseahon hosanna mate di hau pinarsilang, asa mulak marsaor jolma i tu Debata. Molo songon i ma balga ni holong ni Kristus maradophon jolma, ingkon olo jolma i mian dibagasan Kristus, jala ingkon olo jolma i dipaimbaru.

Molo tapamanat tu pudi (Surat 1 Korintus), ditogoshon ibana i, laho pasahathon hata poda tu halak Kristen na di huta Korint do asa marsihohot nasida di hasadaan ni huria. Asa unang be jumpang hagunturon dohot parbolatbolatan di nasida, nangpe torop angka panurirang dohot parbarita nauli na ro mandapothon nasida hatiha i. Alai molo suratna na-pauduahon on, mangondolhon las ni roha dohot hadameon na sian Jesus Kristus. Asa ganup halak Kristen na adong disi, naung manandai holong ni Kristus marsihohot dibagasan haporseaon di na paimahon ari haroro ni Jesus Kristus na paduahon, jala olo mangurupi angka huria na pinagosagosa, na pogos na adong di Jerusalem.

2.      Hatorangan ni turpuk

Ø  Ayat 17-19“Sada jala na pinaimbaru do ganup jolma na porsea dibagasan Kristus”

Perpecahan sering terjadi jika masing-masing orang menonjolkan perbedaan-perbedaan. Perbedaan itu memang adalah  anugerah tetapi ketika ditonjol-tonjolkan bahkan dipakai memojokkan dan menyudutkan orang lain itu yang jadi masalah. Pandohanon sisongonon ma na masa dingolu ni halak Kristen di Korintus na binereng ni Apostel Paulus, gabe dipaingot ibana nasida asa bukka mata nasida marnida hasadaon na pasadahon nasida songon siihuthon Kristus. Apostel Paulus mambungka mata ni haporseaon nasida laho marnida hangoluan (keselamatan universal) naung binaen ni Jesus Kristus. Ibana mate tu sude jolma (15-16). Ibana mate holan humonghop hita (Rom 5:6-8), jala hita nunga mate raphon Kristus (Rom 6:8). HamamateNai do na manggantihon hita, gabe malua hita sian dosa dohot hamatean, jala uhum dohot hangoluan na sian Debata nunga be di pamasa Kristus dingolunta. Naung rap mate hita dohot Kristus dibagasan pandidion na badia i, ima na gabe dasor ni habadiaonta. Dibagasan Jesus Kristus hita nunga dipangolu/dipaimbaru Ibana.laos on ma impola ni hasintongan ni hakristenonta. Dibagasan Ibana hita marpungu jala sada songon ianakhonNa. Jala pandohan on do na gabe dasor di hita marnida angka donganta sa haporseaon. Jala on ma na ni ingil ni Apostel Paulus tu halak Korintus, asa unang be adong pandohan na mandok: “siseanni/siihuthon Paulus, Kefas, manang Apollos do ahu”, “Jahudi do au, jala siula patik ni Debata do ahu”, “Tarsunnat do ahu”.

Hatoranganna: Nang pe naung gabe halak Kristen halak Jahudi na di Korintus, alai sai lohot dope dibagasan roha nasida ruhut parugamoon na robi nasian ompu nasida. Didok nasida do asa ganup halak Kristen mangihuthon nasida (tradisi keagamaan), ala na mangulahon patik do tigor sahalak jolma di adopan ni Debata. Kristen nasida hape pangantusion nasida taringot tu haluaon ni jolma hot dope dipangantusion ni Jahudi, pangantusion nasida hot dope di pangantusion na robi. Sai dipangasahot nasida dope patikpatik ni Hajahudion na gabe dalan haluaon. Ndang diantusi nasida dope na holan ala panghophopon ni Jesus do boi malau jolma sian dosa. Alani ma dipatangkas Apostel Paulus, molo dibagasan Kristus halak, na tinompa na imbaru ma i. Ndang be parsunaton na manontuhon sada halak tigor manang ndang tigor di adopan ni Debata, ndang ala ni pambahenan (amal). Alai holan asi ni roha ni Debata do na mambahen mangolu jala tigor jolma i di jolo ni Debata (Sola Gratia), jala laos i do na pasadahon hita dibagasan Ibana. Ndang adong sipangasahonon ni jolma di jolo ni Debata, asi ni roha ni Debata do sipangasohonta asa dapotan haluaon hita. Alani haserepon dohot panandaon di diri, i do tanda ni haimbaruon ni jolma na porsea di panghophop ni Jesus Kristus. Molo didok Apostel Paulus, olo ma ma hita dipaimbnaru, tatanda ma dirinta, tatiru Jesus na olo patutoru diriNa, asa malua hita sian dosanta.

Ø  Ayat 20 “ Siula tona ni namarsuru”

Apostel Paulus manghatindanghon dirina songon partonaan ni Kristus (Utusan Allah = duta-duta Kristus = kuasanya sama dengan kuasa si pengutusnya). Namarlapatan do pandohannai, asa ganup aha na ni ulana sude nai marharoroan sian Jesus Kristus namarsuru ibana (pad. Rom.14:7-8). Na so manghatindanghon taringot tu dirina, alai manghatindanghon goar ni na marsuru ibana. Alani do ndang boi sumbarang hata na haruar sian pangamanna, ingkon hata/tona na sian namarsusru ibana do hatahononna, jala siondolhonanna tu ganup ruas na adong disi asa olo pasahathon dirina dipadame dohot Debata marhite Silang ni Jesus Kristus. Mansai uli do Debata, olo padamehon hita dohot Ibana marhite Silang ni Kristus i.

Ø  Ayat 21 “Gabe Panondang dibagasan Ibana”

Apostel Paulus naeng mangalehon pangantusion tu jolma i asa olo jolma i dipadame dohot Debata Kristus na gabe jolma, na so mardosa/tumanda dosa gabe mardosa ala ni hita jolma. Marhite asi ni roha ni Debata, diseahon Anakna laho manobus jolma sian dosa dohot hamatean, asa gabe sintong jala tigor hita diadopan ni Debata (1 Pet. 3:18). Marhite panghophopNai do gabe jumpang di hita haluaon dohot hatigoran na sian Debata. 

3.      Sipahusorhusoron

1.      Torop do dingolunta sinuaeng, naung mananda Kristus Jesus songon sipalua/nanung gabe Karisten ala parulaon dohot pambahenanna ndang sintong songon parulaon ni halak Kristen. Jala nunga godang na masa parbolatbolatan di tongatonganta disiala ni ragam nipingkiranta. Molo taingot masamasa Krisis ni HKBP ditaontaon na salpu, na gabe possa HKBP (Dua kubu), antara ni si A dohot si B. Mansai ngeri do peristiwa I dihatihai pola do marsibunuan angka ruas dohot do tahe nang angka pangula partohonan. Hea do hami rap dohot dongan tu sada huria pas keadaan marsermon ma huria i, jadi ro ma sungkunsungkun ni nasida: Sian Huria dido hamu? Ro alushu: HKBP Ress. Parongil, amang. Ro nasadanari pittor didok ma tu hami: SSA do i manang Monjo? Molo “on” do i, ndang boi hamu dison! Tarhalomong hami umbegesa i, alai hualusima: Ndang pola huboto manang tudia amang, ai aman-aman do hami na sahuria. Boasa taparsoalhon be haroa angka naung salpu, kan nunga be mardame jala marsada HKBP nuaeng? HKBP sada do diadopan ni Debata, alai boasa adong dope gombaran sisongoni sahat tu nuaeng? Songonon ma hirahira gombaran ni na masa di Halak Korintus, na gabe patubuhon parsalisian dohot donganna. Alani ma hita songon parhalado ni HKBP ingkon tanom do dibagasan rohanta, ia HKBP sada do diadopan ni Debata, unang be adong pandohan sisongon i, na gabe patubutubu parsoalan dohot parponcaan di tongatonga ni hurianta. Naung tinobos jala naung pinaimbarau ni Debata do hita, ingkon bolongkonon ni sude ruas dohot pangula ni huriama pandohon sisongoni asa dame Hurianta laos boi hita mardame dohot Ibana.

2.      Songon napinillit ni Debata hita gabe ulaulana ni tongatonga ni Huria, nunga be singkop parulaonta songon poda tohonan naung sahat tu hita? Toropan do pangula ni Huria na olo jala rade gabe pangula ni huria alani……, gabe sipata ndang sintong parulaonna hombar tu tohonan i. mansai tullom do didok Apostel Paulus, pangula ni huria ima partonaan ni Kristus. Tohonan naung pinasahatNai ima sada ulaon na hushus do i diadopan ni Debata, jala borat do tanggungjawabni, alani songon naung tinodo jala pinillit ni Debata hita gabe pangula nihuria ditongatonga ni huria i, ingkon saurdok ma pandohan, pambahenanta songon naung tinonahon ni Debata.

3.      Dimasa sinuaeng nunga toropan angka Hurianta na pinagosagosa ni panggomgominta. Adong do i na maol laho pajongjonghon Garej, adong muse do i naso boi mangulahon parmingguon siganup Minggu. Nunga boha na taida sian tongatonga ni hurianta on, taringot tu ulaon na mardame? Nunga mardame be hita dohot nasida angka namanegai bagas joro, tu angka nasida na pamaolmaol ijin laho pajongjonghon Gareja, dohot tu angka namangkasogohon HKBP? On ma ulaon na pinasahat ni Debata tu hita, asa gabe siboan dame dohot hatiuron hita tu donganta, musunta, dohot tu Tuhan i. Di jou hita asa mardame dohot portibion.

4.      Panimpuli

            Songon naung tinobus ni Jesus Kristus, jala naung pinillit na hita gabe pangula di porlak anggurNai, ingkon imbaru ma hita, tatadingkon ma angka pangalaho na robi gabe naimbaru di sandok perulaon, pandohan, nang dipambahenanta. Asa molo dibagasan Kristus halak, na tinompa na imbaru ma i. Amen……..